اليوم وبينما وانا ذاهب لاشتري خبيزات بش نتقوت بيهم واذا بي اتفاجا واستغرب مما وجدته امام المخابز الناس وجوهها سوداء وزرقاء من شدة اللهاف يا لطيف وش كاين هذا ياناس وش راه صاري انا اتخلعت ضننت اننا مقبلين على حرب عالمية ثالثة بعيد الشر هذاك يقلو ارا عشرين خبزة ويترعد وواحد يلهث ماصاب وقتاش توصل دالتو ويضبح من بعيد ويقلو خليلي سطاش انخبزة ولاخر يقلو والله راني مغصوب اخاوتي خلوني نفوت تعرفو لهاف كبير ربي يستر وربي يجعل الخير من هاذ اللهاف لي طاح على الشعب واحد تاني لقيتو داخل السوبيرات جاب شكارة تع فرينة تع 50 كيلو فارغة ودخل يعمر في العدس واللوبيا والسباقيتي والطماطيش وزيد وزيد تقول راح يفتح اليمونتاسيو جنيرال الله يحفظنا يا ناس خلونا نموتو بالخير لي عطاهنا ربي ومانموتوش بالشر والعياذ بالله هذا خير عطاهونا ربي سبحانه نحمدوه ونشكروه على حنا كي يعطينا ربي الخير كما هذا نرجعو نعيطو للشر حنا شعب هاماج وانا الهمجي الاول فيهم لا نظام لا عمار بوزوار وانا الملهاف الاول ربي يسترنا وخلاص
السبت 11 فبراير 2012 - 18:24
